MNREGA chhunzawm zel a ni dawn: PM

Prime Minister Narendra Modi chuan UPA sorkar flagship program, Mahatma Gandhi National Rural Employment Guarantee Act (MNREGA) chu kalpui chhunzawm zel a nih tur thu a sawi.

Nimina Parliament inkhawma thu a sawiah, PM chuan, "MNREGA hi chawlhsan a ni lo ang tih ka tiam duh a ni. He thil hi Congress hlawhchhamna lantirna chiang tak a ni. Kum eng emaw zat thuneihna an chan hnuah an tih theih chu mi retheite hnenah thla khata ni tlemte hna thawh tur siamsak a ni," a ti.

Modi chuan scheme chu him leh ṭha zawka siam a tiam a, "Hemi avang tal pawh hian min fak ve thei ang chu," a ti.

Mahatma Gandhi National Rural Employment Guarantee Act hi Congress kaihhruai UPA sorkarin a siam a ni a, he scheme hmang hian thingtlanga cheng, puitling tan kum khatah ni 100 inhlawhna siamsak ṭhin a ni. Kum 2006 khan he scheme hi kalpui ṭan a ni.

PM chuan eptute leh NDA hnuaia an thawhpui party ṭhenkhat ngei pawhin an dodal, land acquisition bill siamṭhat chu tih ngei ngai a ni, a ti. Modi chuan, "Loneitute chu he dan, kum 120 zet lo hman tawh hnuaiah an la awm reng a, an dikna chanvote pawh an tilang thei lo a ni," a ti a, dan siamthar chu loneitute tana ṭha lo a nih chuan a thlakna tur rawtna a dawng thei reng tih a sawi bawk.