TMC parliamentary party chairman aṭangin Mukul Roy ban a ni

West Bengal-a rorellai, Trinamool Congress party chuan nimin khan MP, Mukul Roy chu parliamentary party chairman a nihna aṭangin a ban.

Mukul Roy hi TMC hotu lu ber, Mamata Banerjee thlaktu tura rinkai ber a ni a, mahse tun hnaiah hruaitu pahnihte inkar boruak hi a ṭha lo hle.

Railway Minister hlui, Mukul Roy hi Saradha group-in investor-te sum tam tham tak a tih­chingpen kaihhnawihah Central Bureau of Investigation (CBI) chuan thu a zawtfiah tawh a, he thil thlen hnu hian an party hotu nena an inkar boruak pawh hi a chhiat phah nia sawi a ni. Trinamool Congress dintu zing a mi, Roy hi tun hnaiah an party aṭang hian a inla hrang sawt hle nia sawi a ni bawk.

Roy ban a nih hma hian TMC chuan an party hruaitu leh state minister hlui, Humayun Kabir chu Mamata Banerjee a sawisel avangin party aṭangin a lo hnawt­chhuak tawh bawk. Kabir hian Banerjee chuan an party tana mi ṭangkai, general secretary Mukul Roy-a pawimawhzia a ngaihthah a, amah thlaktu atan a vahpa Abishek Banerjee a hual tiin a sawi.