Kumina carbon emission 8%-in a hniam dawn

India ram hmun hrang hranga Covid-19 hri leng vanga inkharkhipna hman a nih vangin kumina carbon emission tlakhniamna tur chu 8% vel a nih an beisei thu environment ministry-a official-te chuan an sawi.

Nilaini khan PHD Cham­ber of Commerce and Industry chuan video kaltlangin session an nei a, he hunah hian environment chungchang sawi niin, Covid-19 hri leng vangin harsatna tam tak tawk mek mah ila, he hri leng hian hmachhawp tam tak a siam thute an sawi a ni.

Hri leng vanga inkhar­khipna avangin mi tam takin pawn an chhuah tlem phah a, hei vang hian nikum lam aiin lirthei vak vel chu a tlem phah hle. Hei bakah hian hun eng emaw chen hri leng vangin industry leh factory ṭhenkhatte chu khar  a ni bawk. Hengte hian sumdawnna kawngah leh economy lamah a chhe zawngin nghawng nei mah se environment lamah a ṭha zawngin nghawng a neih phah thung.

Paris Agreement-ah khan India chuan kum 2030-ah ram chhunga emission chu 30-35% a tihhniam a tum a, hei bakah hian kum 2030-ah chuan carbon dioxide tonne vaibelchhe 2.5-3 a tihtlem hman a tum bawk a ni.

Thla hlui khan union envi­ronment minister Prakash Javadekar chuan kum 2005 leh 2014 inkar khan India chuan emission 21%-a a tihtlem hman thu a sawi a, kum 2020 hmaa emission tihtlem tum target an siam aia hmaa an hlawhtlin thu a sawi bawk.