Delhi I-Day lawmnaah Atishi-i'n hnam puanzar a pawtparh ang: Kejriwal

Tihar Jail-a tang mek, Delhi chief minister Arvind Kejriwal chuan Delhi lieutenant governor VK Saxena hnenah lehkha thawnin, August 15-a Delhi-a Independence Day lawmnaah cabinet minister Atishi chu hnam puanzar pawt parhtu a ni dawn tih a hrilh.

Aam Aadmi Party (AAP) thupuangtu chuan CM Kejriwal-a'n Lieutenant Governor hnena lehkha a thawn thu nimin khan a sawi a ni. Atishi hian CM awm loh chhung a ai a lo awh dawn a ni.

Delhi sorkar hian kumtinin Chhatrasal Stadium-ah Independence Day lawmna hun hi a hmang ṭhin a ni.CM hi jail-ah a tan mek avangin kumina I-Day lawmnaah a telpui thei dawn lo a, hei vang hian excise policy kaihhnawihah Delhi deputy chief minister hlui, Manish Sisodia man a nih hnu, kum 2023 kumtir lam khan Atishi hi minister atan ruat a lo ni tawh a ni.

AAP national convenor, Kejriwal hi Delhi excise policy hman dik lohnaa inhnamhnawiha puh a nih chungchangah March 21 khan Enforcement Directorate (ED) ten manin, Tihar jail-ah thubuai neiin a tang mek a ni. Supreme Court chuan interim bail phalsak mah se, Central Bureau of Investigation (CBI) in excise policy kaihhnawiha a man ve leh avangin jail-ah a la awm chhunzawm a ni. Kar liam ta khan CBI-in an man chungchang ngaihtuah ṭha tura a ngenna chu Delhi High Court chuan a lo hnawlsak tawh bawk a, mahse trial court lamah a thlen zui erawh a remtihsak thung.