SC/ST quota chungchanga SC thutlukna Congress hruaituten sawi ho

Congress party president Mallikarjun Kharge chuan tun hnaia Supreme Court-in SC/ST reservation chungchanga thutlukna a siam sawi ho turin Thawhlehni khan an party hruaitute meeting a neihpui.

Rajya Sabha-a Leader of Opposition ni bawk, Kharge hian a chenna inah meeting hi koin, Congress Parliamentary Party (CPP) chairperson Sonia Gandhi leh Lok Sabha-a Leader of Opposition Rahul Gandhi te pawh an tel. Meeting hi darkar khat leh a chanve vel niin, Supreme Court thutlukna siam dan leh, caste census neih rawt chungchangte an sawi ho a ni.

Chief Justice of India D.Y. Chandrachud kaihhruai Supreme Court bench chuan kar liam ta Ningani khan presidential list a Schedule Caste ṭhenhran a nih dan chungchangah rorelna tichhuakin sorkar chuan list awmsa chu a duhdanin a ṭhenhrang thei tih a sawi. Hei hi hna lakna emaw zirna-in emawa an luh theih nana a duhsak theihna turin Schedule Caste list hi sorkar chuan a ṭhen danglam thei a ni, Court chuan a ti.

Hemi bakah hian Scheduled Castes leh Scheduled Tribes, khawsak phunga dinhmun ṭhate chu SC/ST dangte hamṭhatna pek chuhpui thei lo turin sorkar chuan hma a lak a ngai a ni, a ti. Hei hi Other Backward Classes (OBC) category tan hman a ni tawh a, SC/ST tan hman ve ni turin sorkar chuan hma a lak a ngai niin court chuan a sawi. SC/ST zinga harsa zawkte tan chauh hamṭhatna siamsak theih ni se tiin court chuan sorkar a hriattir a ni.

Supreme Court-in SC/ST-a sub-quota siam a remtih hi eptu party-te bakah Dalit hruaitute pawhin an duh lo hle. Lok Janshakti Party hruaitu. Chiraj Paswan chuan SC chu a thutlukna ngaituah ṭha leh tura ngen an tum thu a sawi. Court thutlukna duh lotu zingah hian Mayawati party BSP leh Ramdas Athawale kaihhruai Republican Party of India pawh an tel.