Wayanad leimin national disaster-a puang turin ngen

Lok Sabha-a leader of opposition, Rahul Gandhi chuan nimin khan sorkar laipui chu Wayanad, Kerala-a chhiatna rapthlak tak thleng chu national disaster-a puang turin a ngen.

Rahul Gandhi hian Lok Sabha inkhawma Zero Hour-a thu a sawiah hei hi sawi chhuakin, chhiatna tuartute chhawmdawlna tur, special package siam tur leh, zangnadawmna tam zawk pe turin sorkar chu a phut bawk.

Wayanad leimin rapthlak tak national disaster-a puan a ṭul thu a sawinaah Gandhi chuan, "Ka mit ngeiin ka hmu a, chhiatna thlenna hmun hrang hrang ka tlawh bawk. Hmun ṭhenkhatah chuan chhungkuaa mangte an awm a, ṭhenkhatah chuan chhungkuaa mi pakhat chauh dam khaw chhuakte an awm a ni," a ti. 'Mitthi hi 200 an chuang tawh a, chin hriat lohin mi tam tak an la awm avangin thi zat hi 400 pawh an chuan a rinawm a ni," tiin, hemi rual hian chhiat tawkte chhanchhuah leh ṭanpui hna thawktute chunga a lawm thu pawh a sawi lang bawk. State dang - Karnataka, Tamil Nadu leh Telangana-ten an puihna avang te, central force leh army te inpekna te chu ropui a tih thu a sawi.

Mi dangte ṭanpui hna thawka mipuite inlungrualna chuan a rilru a hneh hle tih Gandhi chuan a sawi bawk. Rahul Gandhi leh a farnu, Priyanka Gandhi Vadra te chuan August 2, 2024 khan leiminna hmun hi tlawhin, leimin tuartu ṭhenkhat an hmu bawk a ni.