Wayanad leimin : Ni 7 chhungin CMDRF-in Rs vbc 53.98 dawng

Kerala sorkar chuan Wayanad district-a leimin rapthlak tak thleng tuartute ṭanpui leh chhawmdawlna turin, chhiatna a thlen aṭanga ni sarih chhungin Chief Minister's Disaster Relief Fund (CMDRF)-ah Rs 53,98,52,948 a dawng.

Harsatna tawkte ṭanpuina tur hian pawl leh mimal ṭhahnem takin ṭanpuina sum hi an thawh khawm. Political party hrang hrang pawhin ṭanpuina pe tur hian mipuite an ngen. Kerala-a migrant worker-te pawhin an ni khat hlawh an thawh hlawm a, fak pawh an hlawh phah hle.

July 30, 2024-a chhiatna thleng vanga thi hi mi 300 an chuang tawh a, nimin thleng khan chin hriat lohin mi 150 chuang an la awm bawk. Chhiatna thlen nasat zualna hi Mundakkai leh Chhoralmala a ni. Sorkar chuan chhiatna tawkte atan hian relief camp 91 a siam a, heng hmunah hian mi 9,328 an la khawsa mek a ni.

Prime minister Narendra Modi chuan naktuk, August 10 hian leimin thlenna, Wayanad district hi a tlawh dawn. PM hian relief camp, hospital te tlawhin, chhiatna a thlen hnuah sipai Bailey bridge an dawh thar pawh a en nghal dawn bawk. Leimin thlenna hmunte chu thlawhtheihna aṭangin a en kual dawn bawk a ni. Chhiatna thleng tuartu ṭhenkhatte chu kawmin, hemi ni vek hian Delhi lamah a kir leh nghal ang.