West Bengal CM hlui Buddhadeb Bhattacharjee a thi

West Bengal chief minister hlui leh Communist hruaitu lu, Buddhadeb Bhattacharjee chu August 8, 2024, Ningani khan kum 80 mi niin a boral, a nupui leh fanu a thihsan. Vawiinah vui a ni ang.

Buddhadeb Bhattacharjee hian a taksa pengte chu a mamawh tute tana hman turin a lo donate tawh a, a duhthlanna tihhlawhtlin sak a ni dawn a, a taksa peng hrang hrangte chu medical college-hnenah hlan a ni ang, tiin Comunist Party of India (Marxist) state secretary Mohd Salim chuan a sawi. A ruang hi amah uituten zahna leh thlahna hun an hman theihna turin CPI(M) headquarters-ah dah lailawk rih a ni.

Bhattacharjee hian 2000-2011 chhung khan West Bengal chief minister dinhmun hi a zawnin term hnih a chelh a ni. Kum eng emaw chen liam ta aṭang khan a taksa chak loin a khawhmuh te pawh a fiah lo ṭan a, hei hi Chronic obstructive Pulmonary Disease (COPD) vang niin mipui zingah a tel tam lo chho zui a ni. Kum 2015 khan an party thuthlukna siamtu leh central committee aṭangin a in hnukdawk a, a hriselna tlahniam zelin 2016 kum aṭangin Palm Avenue-a a chenna inah enkawl a ni a, a enkawlna senso pawh an party lamin an tum sak vek a ni.