Sorkarin Parliament-ah Waqf (Amendment) bill pu lut

BJP kaihhruai National Democratic Alliance (NDA) sorkar chuan Muslim-ten an dodal nasat tak, Waqf Amendment Bill 2024 chu nimina Lok Sabha inkhawmah a pu lut.

Minority affairs minister Kiren Rijiju chuan bill hi pu lutin, he bill-ah hian State Waqf Board-in registration, survey leh dan loa ram nei nia a puh chungchanga thuneihna a neihte siam ṭhat rawt a ni.

Eptu party-te chuan Waqf (Amendment) Bill, 2024 hi an sawisel a, ram danpui kalh leh, sakhuain dikna chanvo a neih beihna a ni, an ti.

Congress MP Hibi Eden chuan he bill hi ram danpuia Right to Property (Article 300A) nen a inkalh a ni, a ti. Bill hi mimal leh sakhaw institution-te propery rights an neiha inrawlh tumna a ni, tiin a sawi.

AIMIM chief leh Lok Sabha MP Asaduddin Owaisi chuan BJP chu he bill an pharh avangin India ram chhunga Muslim-te hmelma an ni tiin, BJP chuan ram mipuite a ṭhendarh a ni, a ti. Samajwadi Party hotu, Akhilesh Yadav pawhin bill hi BJP in an party ṭhatna tur chauh ngaihtuah a an pharh a ni tiin, DMK MP Kanimozhi chuan Constitution palzutna dik tak a ti a, bill hian sakhaw tih bik a nei nghal a ni, a ti.

Eptu party hrang hrangten an sawisel laiin, bill pharhtu union minister Rijiju chuan bill hian sakhaw pawlin zalenna a neih chungchangah inrawlhna a nei lo tiin, midang dikna chanvo chhuhsakna tur ni loin, a hmaa dikna chanvo nei ve lote hnenah an chanvo pekna tur zawk niin a sawi ve thung.

Islamic law anga sakhaw hmun leh thil dang atana hmun pekte chu waqf tana dah an ni tawh chuan sut theih a ni tawh lo a ni. Waqf board hi 30 vel awmin, ram acre nuai 9 chuang an nei mek a, a hlut zawng hi Rs vbc nuai 1.2 vela chut an ni. Waqf board hi India-a ram nei zau ber pathumna niin, Railways leh Defence Ministry chauh an tluk lo a ni.