Naupang kum 11 mi nupuiah nei

Jharkhand state Bharatiya Janata Party (BJP) President Tala Marandi-a fapa Munna Marandi chuan nupui atan kum 11 mi lek a nei a, media-te chuan an ngaihven zui hle.

Tala Marandi hi Jhar≠khand state BJP president atan hian thla hmasa lawk khan ruat a ni a, Sahibganj district-a Borio Assembly constituency aṭanga thlan tlin a ni.

Munna Marandi hi mipat hmeichhiatna lamah sulhnu ṭha lo tak a nei nia sawi a ni a, tuna a nupui lo pawh midang lakah chanchin duhawm loh tak tak a nei nia sawi a ni. Munna Marandi hian kum hnih chhung vel chu nupui a lo nei tawh a, tun hnaiah kum 11 mi lek a nei zui leh hian mi mak tih a hlawh hle.

Marandi an naupang kum 11 mi nupuiah a nei tih hriat a nih veleh hian hmeichhe pakhat chuan, Godda district court-ah thubuai a thehlut a, Munna Marandi hian sex a hmanluih pui ṭhin a, nupuiah neih a tum niin a sawi.

Marandi hian he hmei≠chhia hi mobile phone leh thil dangte a lei sak nia sawi a ni a, sex an hman ṭhin thu leh nupuiah neih a tiam thu he hmeichhia hian a sawi a, nimahsela midang a neihsan leh ta si a ni.

Marandi hian Thawhlehni khan nupui hi a nei a, a hnuah naupang kum 11 mi a ni tih chu a darh zui. Jharkhand Women Commission te chuan Nilaini khan mipat hmeichhiatna mawi lo tak hmang ṭhina puh Marandi-a chet dan chu an dem thu an sawi a, commission Chairperson Mahua Manjhi chuan, thubuai ziahluh chu chinfel vat an phut thu a sawi.

Jharkhand Chief Minister Raghubar Das chu an in neih tuka wedding reception Godda-a neih turah sawm a ni a, nimahsela boruak duhawm lo a awm tak avangin a ṭhulh.

Hemi chungchangah hian state Bharatiya Janata Party chuan thuchhuah an la nei lo a, opposition party lam chuan chhui chian an phut thu an au chhuah pui thung.

Jharkhand Congress General Secretary Alok Dubey chuan, hmeichhe kum tling laka thil thleng chu an dem thu a sawi a, tun hnuah chuan thleng tawh lo se an duh thu leh, pawikhawitu chet dan chu chui chian an phut thu a sawi.