Sum leh paiah Kerala state a talbuai

Kerala state assembly chu Ningani khan an ṭhu khawm a, an state-in sum leh paia harsatna a tawh mek chhung≠chang an sawiho. Assembly-ah hian an state sum dinhmun kimchang chu pharh a ni a, an sum harsatna tawh mek sukiang tur hian kum tin chhiah aṭanga an sum lak chu 20-25%-a kum nga chhung tihpun a nih chuan a ziaawm beisei a ni.

Finance minister TM Thomas Issac chuan, an state leiba chu cheng vaibelchhe 10,000 chuang a ni a, tlachhe mai thei dinhmunah an ding tih a sawi.

An sum harsatna sukiang tur hian hun an mamawh deuh dawn tih minister chuan a sawi. Issac chuan, scheme leh project ṭhenkhat chu sum awmsa loa thawh a nih thu sawin, chu chuan leiba nasa takin a tipung tih a sawi.

Minister chuan state sorkarin 'Non plan revenue expenditure' a enfel a ngai a, chu chu sorkar hmasa khan a ngaihthah a ni a ti. Khatih hun lai khan budget-a tel lo project eng emaw zat chu cabinet remtihna la loa kalpui a ni a, chu chuan sum indaih lohna a thlen ta a ni.

Chief minister kal chhuak ta Oommen Chandy khan mass contact programme aṭan cheng vaibelchhe 700-800 a hmang a, chu chu budget aṭanga pawh pen a ni a ti.

Suma an harsatna sukiang tur hian sorkar chuan chhiah tam zawk commercial, motor vehicle, registration, revenue leh excise aṭang tein a lak a ngai a ni a ti.