NCCPA te 7th Pay Commission ruahmannaah lawm lo

National Coordination Committee of Pensioners Association te chuan July 11 hian 7th Pay Commission dodalna lantir an tum thu an sawi.

Union Cabinet-in 7th Pay Commission hmang tura ruahmanna a siamah NCCPA te hian an lungawi lo tih an sawi. 7th Pay Commission ruahmannaah hian sorkar hnathawk hlawh tlem ber chuan Rs. 18,000 a hlawh dawn a, Pay Commission hman laiah hian Rs. 7,000 a ni. 7th Pay Commission ruahmannaah hian hlawh tihpun nan hian 2.57 (fitment formula) hman a ni a, sorkar hnathawk hlawh tlem berin a hlawh tur Rs. 18,000 chu bei tham an tih thu leh 3.68 (fitment formula) hman an duh thu All India Railway Men Federation and Convenor of National Joint Council of Action (NJCA) General Secretary Shivgopal Mishra, chuan a sawi.

NJCA hi sorkar hnathawk inzawm khawm pawl a ni a, Confederation of Central Government Employees (CCGE), All India Defence Employee Federation leh National Coordination Committee of Pensioners Association te chu member an ni. NJCA hnuaiah hian sorkar hnathawk nuai 33 vel an awm a, sorkarah an thil phut te an thlen hnuah an beisei anga sorkarin hma a lak loh chuan July 11 hian lungawi lohna lantir an tum thu an sawi. 7th Pay Commission rawtna sorkar hnathawk hlawh tlem berin a hlawh tur Rs. 18,000 chu Rs. 26,000-ah tihsan an phut a ni. He mi chungchangah hian Home Minister Rajnath Singh, Finance Minister Arun Jaitley leh Railway Minister Suresh Prabhu te nen June 30 khan meeting an nei. NJCA te chuan sorkar chhanna chu July 4 emaw 5 thleng an nghah tur thu an sawi a, a thuphung chuan meeting-ah khan inremna an nei tawh nia hriat a ni. An hruaitu Kutty chuan sorkar thu an ngaih chan mek thu a sawi a, a thuphunga inremna chu la ngaihtuah leh tur a nih avangin thu chiang nghah mek a ni. Sorkar nena a thuphunga inremna hi sawh sawn a ni emaw, tihdanglam a nih chuan lungawi lohna lantir a ni ang a ti.

All India Defence Employees Federation General Secretary C Srikumar chuan, "June 9 khan sorkar kan lo dawr tawh bawk a, an hnen aṭang hian chhanna duhawm kan dawng lo a ni" a ti. NJCA te hian sorkar laipuiin a duan National pension scheme (NPS) October 2004
aṭanga hman chu tihtawp an phut bawk.