PM Modi-an a cabinet siksawi dawn

Prime Minister Narendra Modi chuan vawiin hian a cabinet a siksawi dawn a, minister thar eng emaw zat lakluh belh an nih rin a ni.

PM-in cabinet member tharte a puan hnuah, BJP president Amit Shah pawhin BJP office-bearer tharte a puan ve nghal rin a ni bawk. Hetianga party hruaitu leh cabinet minister siksawi hi nakkum kumtir lama Uttar Pradesh assembly inthlan neih tur thlira an party tha tihchakna pakhat atana ruahman nia sawi a ni.

Cabinet minister thar atana ruatte hi vawiin vek hian Rashstrapati Bhavan-ah rinawmna thu tiamtira lakluh nghal an ni ang a, UP aṭangin council of minister-ah hian mi pahnih tal dah belh an nih rin a ni bawk.

Minister siksawi a nih rual hian minister-te chanpual pawh siam ṭhat a ni dawn bawk a, mahse portfolio pawimawh pali - Home, Finance, Defence leh External Affairs changtute chu sawi danglam an ni lo ang.

PM Modi hian cabinet siksawi chungchang hi thla khat leh a chanve chhung zet chu BJP president Amit Shah lo sawipui tawhin, thutlukna an siam thei ta a ni. Hruaitu pahnihte hi kar kalta khan darkar li chuang zet inkawmin, cabinet leh BJP hruaitu ruat chungchang sawidunin an inkawm bawk.

Centre-a NDA kaihhruai sorkarah hian PM tel hian minister 66 an awm mek a, Constitution chuan mi 82 chin a phalsak a ni. Sports Minister Sarbananda Sonwal chu Assam Chief Minister a nih tak avangin amah thlaktu tur pawh dah a ngai dawn a ni.

Cabinet member thar lakluh turah hian NDA sorkara tel, party tenaute chanvo pek an nih rin a ni a, hetihlai hian MoS Social Justice Vijay Sampla leh MoS Chemical and Fertilisers Nihal Chand te erawh chu cabinet aṭang hian paih an nih rin a ni thung. Union Power Minister Piyush Goyal leh State Minority Affairs Minister Mukhtar Abbabs Naqvi-te chu chanvo pawimawh zawk pek ni tura rin a ni.