Punjab Poll: AAP in Youth Manifesto tlangzarh

Aam Aadmi Party (AAP) chuan nakkuma assembly inthlan neihna tur, Punjab-ah ṭhalaite tana an hmalakna tur, Youth Manifesto a tlangzarh.

Delhi Chief Minister leh AAP National Convener Arvind Kejriwal chuan party youth manifesto hi a tlangzarh. AAP-in sorkar a siam chuan kum nga chhungin ṭhalaite tan hna thar nuai 25 siam te, thingtlang khaw hrang hrangah Wi-Fi hotspot siam te leh ruihhlo hmanga sumdawngte tihhlum theihna tur, special law siamte a tiam.

AAP chuan an manifesto tlangzarh chu ṭhalaite pual bik a nih thu sawiin, section hrang hrang tana manifesto hran siam an tum tih an sawi. He manifesto hi Punjab Dialogue Committee Chairman Kanwar Sandhu buatsaih a ni a, an tum ber chu Punjab ṭhalaite chu hna thawh tur zawngtu ni lo a,hna thawh tur siamtua siam a nih thu a sawi.

Punjab-ah AAP a sorkar chuan eirukna laka fihlim sorkar siam an tiam a, eirukna leh hlemhletna hrang hrang awmte nuaibo a, sorkar rintlak din turin theihtawp an chhuah dawn tih an sawi.

State chhung block tinah entrepreneurship leh skilling centre 147 din a tiam a, agriculture leh a kaihhnawih industry-te, food processing, dairy farming leh horticulture te chu a bika ngaihsak an ni ang, a ti. Punjab ṭhalaiten rampawn lama hna ṭha tak tak an thawh theihna turin khawpui lian panga-ah ṭhalaite thurawn petu leh training petu tur, Foreign Employment Youth Board din a tiam a, Doaba Region-ah skill university din a tiam bawk.

Punjab-a ruihlo hluar tihrehna turin state leh district level-ah special drug task force din an tiam a, ruihhloa sumdawnna lama politician leh police officer inhnamhnawihte chhui a tiam bawk a ni.