PM-in Africa ram pali fang dawn

Prime Minister Narendra Modi chuan India leh Africa ram inlaichinna nghet zawk siam dan kawng zawngin, July 7-11 chhung hian Africa ram pali a tlawh dawn niin Ministry of External Affairs (MEA) chuan a sawi.

MEA thupuangtu, Vikas Swarup chuan, "PM zin tur hian India-in Africa ramte nena inzawmna nghet zawk leh ṭha zawk neih a duhzia a lantir a, political level-ah inpawhna ṭha zawk a siam dawn a ni" a ti.

Kum 2014-a PM atana lakluh a nih hnu khan, PM Modi hian African Union member ram pahnih, Seychelles leh Mauritius-te a tlawh tawh a ni.

July 7 ah Modi hian Mozambique a pan ang a, an ram President Felipe Nyusi a kawm ang. Mozambique aṭang hian South Africa ram a pan dawn a, President Jacob Zuma leh an ram mi pawimawh dangte a hmu dawn a ni. July 10-ah Tanzania panin, President John Pobe Joseph Magufuli nen meeting an nei ang a, July 11-ah Kenya panin, University of Nairobi-ah thu a sawi ang.

July 8 leh 10 hian PM hian Johannesburg leh Nairobi-ah India mi awmte hmaah thu sawiin, inkhawmhona hun an hman dawn bawk a ni.