SC-in Manish Sisodia bail-a chhuah a phalsak

Supreme Court chuan August 9, 2024, Zirtawpni khan Delhi deputy chief minister hlui, Manish Sisodia-a chu Delhi excise policy kaihhnawihah Enforcement Directorate (ED) leh Central Bureau of Investigation (CBI) in case an siamsaka bail a dilna chu a phalsak.

Justice B.R. Gavai leh K.V. Viswanathan-te awmna bench chuan Aam Aadmi Party (AAP) hruaitu hi Rs nuai 10 dah kham tura hriattirin, a passport a thehluh tir bawk a, kar khatah vawi hnih–Thawhṭanni leh Ningani apianga Investigating Officer hnena in report ṭhin turin a ti a ni. Hei bakah a thubuai neih mekah thuhretute hmin tum leh, finfiahna awmte tihchhiat tuma hma la lo turin a hriattir bawk.

Judge-te hian ED-in bail-a chhuah a nih chhungin Sisodia hi Delhi Secretariat leh Chief Minster Office tlawh phalsak lo tura an ngenna chu an hnawlsak bawk a ni.

CBI hian February 26, 2023 khan Prevention of Corruption Act hnuaiah Sisodia hi an man a, ED hian hemi kum vek, March 9-ah Prevention of Money Laundering Act (PMLA) hnuaiah an man ve leh a ni.

Kumin May 30 khan Delhi High Court chuan Sisodia bail dilna hi a hnawlsak a, June 4 khan Supreme Court-a vacation bench chuan bail dilna hi a hnawlsak ve leh bawk. Mahse bench hian AAP hruaitu hi a bail dilna hi thehlut ṭha leh turin a ti thung.

AAP chuan SC-in thla 18 dawn a tan hnua Sisodia bail dilna a phalsak chu lawmawm an tih thu sawiin, thudikin hnehna a channa a ni, an ti. AAP hruaitu Raghav Chandha chuan, "Delhi education revolution hero, Manish Sisodia bail phalsak a nih avangin ram pum chu a hlim hle a ni. Manish hi ni 530 chhung jail-a khung a ni a, a tihsual awmchhun chu mi rethei zawk naupangte tan an hmalam hun tur ṭha zawk a duansak kha a ni," a ti. AAP Rajya Sabha MP, Sanjay Singh pawhin Supreme Court thutlukna chu sorkar laipui inluling lutuk chhan letna a ni tiin, hun rei tak jail-ah dah a nih avangin Sisodia nun pawh tihchhiat a ni a ti a, jail-ah khung lo se khang hun zawng zawng khan naupangte zirna atan a thawk dawn a ni, a ti.