CBI-in thamna lak vangin ED assistant director man

Central Bureau of Investigation(CBI) chuan Ningani khan Enforcement Directorate (ED) assistant director Sandeep Singh Yadav chu Mumbai-a tlereuh siamtute hnen aṭanga thamna, Rs nuai 20 a lak vang in an man.

ED hian Delhi, Uttarakhand leh Bengaluru police hnen aṭanga FIR eng emaw zat a dawn bawhzuiin August 3 leh 4 khan tlereuh zuartu, Vipul Harish Thakkar in a dap a ni. Hemi chungchang CBI-in a chhuinaah, assistant director Sandeep Singh Yadav hian Thakkar chu vauin, Rs nuai 25 a pek loh chuan a fapa chu man sakah a vau a, mahse an indawr hnuah a sum phut hi Rs nuai 20 ah a tihniam leh a ni. Thamna an inpek fel hnuah tlereuh siamtu hi CBI lamah a zualko zui nghal a ni.

CBI chuan Yadav lakah hian Prevention of Money Laundering Act (PMLA) hnuaiah thubuai a ziak lut nghal a, a hna aṭangin chawlh tir lailawk a ni bawk. CBI hian nikum August thla khan ED assistant director leh official dang parukte chu Delhi liquor case kaihhnawihah Delhi-a sumdawnglian, Aman Dhall hnen aṭanga thamna Rs vbc 5 an dawn vangin an lo man tawh bawk.