J&K state puitlingah hlangkai leh dawn: Union Minister

Union minister of state for social Justice and Empowerment, Ramdas Athawale chuan August 8, Ningani khan Jammu and Kashmir chu kumin October thla ral hma ngeia state puitlinga hlan kai a nih tur thu leh, assembly election pawh a awm zui hman tur thu a sawi.

Union Minister hian news conference-a neihnaah sorkar laipui chuan J&K chungchang hi an buaipui hle tih sawiin, August 2019-ah Article 370 tihbo a nih dawna a lo tiam tawh angin, J&K state puitlinga hlan kai leh hi an tum hle tih Republic Party of India (RPI) leader ni bawk hian a sawi lang.

Athawale hian October thla ral hma ngeiin J&K chu state puitlingah hlan kai leh ngei a nih a rin thu a sawi hnuah Maharashtra, Jharkhand leh Chhatisgarh-ah inthlan neih a ni dawn avangin hemi thla vek hian J&K-ah pawh inthlanna neih hman a nih a rin thu a sawi. He inthlan hi a hlawhtlin nan J&K mipui ten vote an thlak ngei a pawimawh thu a sawi tel bawk.

Minister chuan kum 2019-a Article 370 tih tawp hnuah, ram pawn lam mi khualzin vbc 2.11 laiin J&K hi an tlawh tawh tih a sawi. Industry lian te pawh inkhuar chho ṭanin ṭhalai hna nei lo tam takin hna thawh tur an neih phah a ni, a ti. "Mipuiten Kashmir-a kal hi an hlau tawh lo. A hma chuan rawn kal duh ṭhin mah se, firfiaka chetna thleng ṭhin avangin an ngam leh lo ṭhin," a ti. J&K security dinhmunin hma a sawn hle tawh niin a sawi a, kum thum liam ta chhung khan pawikhawihna lian tham vanga thubuai ziahluh hi case 74 chauh Kashmir huam chhungah hian a awm tawh a, hei hi rampum huapa ziah luh ai pawhin a tlem tawh zawk tih a sawi.