PM-in Wayanad-a lei minna hmun a tlawh

Prime minister Narendra Modi chuan Kerala state-a leimin rapthlak tak thlenna, Wayanad district-a Chooralmala area chu Inrinni liam ta khan a tlawh. Leiminna hmun hrang hrangte chu thlawhtheihna hmanga a enkual bakah, relief camp-a leimin tuarte tlawhin, damdawi-ina hliam enkawl mekte a tlawh tel bawk.

Prime Minister chuan Wayanad-a chhiatna thleng chu chhiatna pangngai a ni lo tiin, harsatna tawkte chhawmdawl leh, leimin hmun din thar lehna tura hmalaknaah theihtawpa puih a tiam. Wayanad-a leimin vanga thi hi mi 400 an chuang tawh a ni.

Kerala chief minister Pinarayi Vijayan, governor Arif Muhammed Khan leh union minister Suresh Gopi-te chuan PM Modi hi an ṭawiawm a, July 30-a leimin rapthlak tak thlengin chhiatna a thlen dante an hrilh.

PM Modi hian Chooralmala area-a leimin thlenna laite chu a hmunah a tlawh a, hei bakah chhiatna a thlen hnuah sipaiten feet 190-a thui, Bailey bride an dawh chu ke in a zawh chhuak a, sipaite nen an inkawm zui bawk. Sipaite hian chhanchhuah hna an thawh dante PM hi an lo hrilh ve bawk a ni. Hemi hnu hian Meppadi-a relief camp tlawhin, harsatna tawktute chu darkar chanve dawn a kawm. Relief camp-a awmte hian an harsatna tawhte chu PM hi an lo hrilh ve bawk a ni. Prime Minister hian Wayanad collectorate chu review meeting a neihpui bawk a ni.

July 30, 2024-a Wayanad district-a leimin rapthlak tak thleng khan in leh structure dang tam tak a hnawl a, mi tam takin an thih phah a ni. State sorkar chuan chhiatna thleng hi National Disaster Management Plan Level 3-a puang turin a ngen a, heihi puan a nih chuan chhiatna thlenna hmun din tharna atan leh, harsatna tawkte chhawmdawlna turin sorkar laipui aṭangin puihna tam zawk an dawng thei ang.

Lok Sabha-a leader of opposition, Congress party hruaitu Rahul Gandhi pawhin Lok Sabha inkhawmah Wayanad-a chhiatna thleng chu national disaster-a puang turin sorkar laipui pawh a lo ngen tawh bawk a ni.

Chin hriat loha awmte zawn hna thawh hnihna kalpui

Wayanad-a leimin a thlen hnua chin hriat loha awmte zawn hna, a thawh hnihna chu nimin aṭang khan zone parukah kalpui leh a ni.

Nimin thleng khan chin hriat loha awm mi 130-te hming chu district thuneituten an ti chhuak a, an zingah hian naupang 24 an tel. Bihar aṭanga inhlawhfaa awm mi pathumte pawh chin hriat loa awm mek zingah hian an tel bawk.

Wayanad Assistant Collector, M Goutham Raj chuan Block level officer, ASHA Workers, Anganwadi Worker, mipui aiawh leh school aiawhte nen chin hriat loha awmte data hi an buaipui tih a sawi. Ruang zawn hna thawhnaah hian rescue team bakah an chhungte leh, leiminna aṭanga chhanchhuahte an pui dawn a, ui fingte pawh hman tum a ni bawk. Official-te chuan ui fingte hian ruang awmna laite an hriat theih chuan excavator hmangin lei hai fai hna hi thawh a ni dawn tih an sawi.