Sorkarin Elephantiasis umbona tur campaign ṭan; A hluarna district paruk-ah inthlurbing dawn

Sorkar laipui chuan lymphatic filariasis natna, elephantiasis tia sawi umbona turin Inrinni liam ta khan ram pum huap campaign a ṭan. Campaign hi he natna hluarna, Bihar, Jharkhand, Karnataka, Odisha, Telangana leh Uttar Pradesh state-a district paruk-ah thlurbing a ni ang.

India chuan piansualna thlen theitu, parasitic disease hi kum 2027 ral hma ngeiin ram chhung aṭangin tihbo hman a tum. Hei hi khawvel huapa he natna umbo tuma an hun tiam aiin kum thumin a hma zawk a ni. He natna umbo nan hian door-to-door campaign neih a, invendan leh inenkawl dan zirtirna te chu natna hluarna hmun bikah te nasa taka neih chhoh a ni ang.

Union minister of state for health and family welfare, Prataproa Ganpatrao Jadhav chuan virtual hmanga ram pum huap Mass Drug Administration (MDA) thawh hnihna a hawnnaah, India chuan lymphatic filariasis venna tur vaccine siam hna a thawh mek thu a sawi. "Lymphatic filariasis hi thosi aṭanga inkaidarh niin, awlsam taka inven theih a ni," tiin thosi sehna laka inven te, anti-filarial medicine eite chu he natna inkaichhawna venna tur pawimawh tak a ni, a ti. India rama state leh UT 20-a district 345-ah he natna vei report hi an la awm a ni.