India ram doctor-te tiamchin awm loin nuar dawn

India ram chhung damdawi-in hrang hranga doctor-te chuan Kolkata RG Kar Hospital-a doctor zirlai rawng taka pawngsual leh thah a nih an duh lohna lantirin, tiamchin awm loin nawrh an huaihawt dawn.

Delhi, Kolkata, Mumbai leh khawpui hrang hranga doctor-te chuan he thil thleng avanga thubuai chinfel a nih hma chuan an hnathawh hrang hrang te tiam chin awm loa chhunzawm rih loh an tum a, nawrh huaihawtte hian medical staff-te tana venhimna ṭha leh changtlung zawk an ngiat bawk.

Kolkata-a RG Kar Medical College-a postgraduate doctor training lai, kum 32 mi chu pawngsual leh thah niin, kar liam ta Ningani zan khan a ruang hi sorkar enkawl hospital-a seminar hall-ah hmuh a ni. Autopsy report-a a lan danin a mit, ka leh serh bawr aṭangin thi a chhuah bakah a ke veilam, nghawng, kut dinglam, hmui leh a kutzungṭangah te hliam hnuhma a awm bawk.

City Police Commissioner Vineet Goyal chuan tualthahna thlen hnuah medical college hi nithum chhunga a ṭum hnihna atan Pathianni khan a tlawh leh a,junior doctor-te chu meeting neih puiin pawikhawihna hi chhui mek a nih vangin thawktute chu thu belhchian dawl lo theh darh lo turin a ngen bawk. He thil thleng avang hian police-te chuan an mi rinhlelh pakhat, Sanjoy Roy an man tawh a, an man hi RG Kar Medical College and Hospital-a thawk ni lo mah se a kal fo ṭhin nia sawi a ni a, Kolkata police-a civic volunteer a ni. Police chuan an mi rinhlelh hian evidence atana hman theih tur thil, a thawmhnawte a sufai vek a, mahse a pheikhawka thisen kai erawh hmuh a nih thu an sawi. Ani bakah doctor thah a nih zana duty, junior doctor pathum leh housekeeping staff pakhat chu thu zawhfiah tura koh an ni bawk.

West Bengal-a junior doctor, intern leh postgraduate training laiten pawikhawihna thlen aṭanga lungawi lohna an lantir chuan ni li a awh tawh avangin state chhunga hospital hrang hrangte pawh an buai phah hle tawh a ni.

RG Kar hospital principal a bang

RG Kar Medical College & Hospital, Prof. (Dr.) Sandip Ghosh chuan hospital-a pawikhawina rapthlak tak thlenga sawisela leh demna na tak a tawh hnuah nimin zing khan a post aṭanga banna a thehlut.

Ghosh chuan an hospital-a thil thleng chungchangah social media lamah na taka demin, hmingchhe takin an chhuah niin a sawi. "Kut tuartu hi ka fanu ang mai a ni a, ni dangah pawh hetiang hi tu chungah mah a thlen ka duh lo a ni," a ti.

State chhunga nawrh huaihawt mek, junior doctor-te pawhin RG Kar hospital principal hi bang turin an lo nawr bawk a, hei bakah hospital staff-te venhimna leh enkawlna ṭha pek an phut bawk.

CM-in CBI kuta hlan a inhuam

West Bengal chief minister Mamata Banerjee chuan nimin khan doctor thah tak chhungte hi a tlawh a, a nu leh paten kawmin an duh dan a nih chuan an fanu chunga pawikhawihna thlen dan chu central agency te chhui tir a inhuam thu a sawi.

Chief Minister chuan August 18 thlenga Kolkata Police-ten he pawikhawihna thlentu hi an chhui chhuak thei lo a nih chuan CBI kutah a hlan dawn tih a sawi a ni. Hemi rual hian central agency-te pawh an thil chhuina kawngah an hlawhtlinna zat hi a hniam viau tih a sawi bawk.