Union Budget 2015

Union Finance Minister Arun Jaitley chuan kar kalta Inrinni khan Lok Sabha-ah Union Budget 2015 a pharh. Hei hi Prime Minister Narendra Modi-a kaihhruai NDA sorkar hnuaia budget puitling pharh hmasak ber a ni.

Sorkar kum thara sum hman ral tura ruahman chu non-plan expenditure-ah cheng vaibelchhe 13,12,200 a ni a, plan expenditure-ah cheng vaibelchhe 4,65,277 a ni. Defence sector atan cheng vaibelchhe 2,46,727 dah a ni a, health sector atan cheng vaibelchhe 33,150 dah a ni bawk.

Sorkar kum kal lai mekah sum indaih lohna tur hi sum dehchhuah aṭanga 4.1% a ni a, hei hi sorkar sum tharah tih­hniam tum a ni, sum indaih lohna hi 3.9% a ni ang. Budget tharah hian personal tax tihsan a awm lo a, corporate tax tihhniam a ni thung.

Arun Jaitley-a rawtna siamah hian hna thar tam zawk siam te, rampawn lama sum chheprelh lakkir te, India rama awlsam zawka sumdawnna kalpui te, Swachh Bharat Abhiyan tana hmalakna thar siam te, middle-class te tana hamṭhatna tam zawk siamte a tel.

Rampawn lama sum chheprelh awm ṭhinte tihtawp dan kawng zawngin, sorkar chuan ramdang an thil neih chheprelhte chu kum 10 thleng tantir theih an ni dawn tih a sawi.

Finance Minister chuan ram venhimna ngaih pawimawh a ṭul thu sawiin, kum 2015-16 atan Defence sector ah cheng vaibelchhe 2,46,727 rua­hman a nih thu a sawi. India ram himna chu thil dang zawng aiin ngaih pawimawh a ṭul a ni tiin Jaitley chuan 'Make in India' policy hnuaiah ralthuam pawh a tam thei ang ber ramchhungah siam tum a ni, a ti. Budget hmasa aia defence budget punna hi cheng vaibel­chhe 24,357 a tling.

Hmeichhiate himna ngaihtuahtu, Nirbhaya fund tan budget tharah hian cheng vaibelchhe 1,000 dah a ni a, hetihlai hian women and child ministry tana sum dah chu kum hmasaa aiin a zahve velah tihhniam a ni thung.