RG Kar Hospital-a tualthahna thleng chungchangah Calcutta High Court-in state sorkar thu a zawt

Calcutta High Court chuan Kolkata khawpuia RG Kar Medical College and Hospital-a doctor zirlai rawng taka pawngsual leh thah a nih chungchangah nimin khan state sorkar thu a zawt.

Doctor zirlai hi kar liam ta Ningani zan khan Hospital seminar hall-ah a ruang hmuh a ni. He tualthihna thleng chungchangah hian police-te chuan mitthi hi mahni intihlum angin an ziak lut hmasa nia sawi a ni a, hei hi a tira a nu leh pa an hrilh dan nia sawi a ni bawk. A nu leh pate hi an fanu ruang hmu tur hian hun rei tak nghah tir an ni tih thu sawilan a ni bawk. Hetianga sawi awm chungchang hi High Court chuan state sorkar a zawtfiah a ni.

High Court hian tualthahna rapthlak tak a thlen hnua RG Kar Medical College principal a nihna aṭanga bang ta, Dr Sandip Ghosh chu chawlh rei tak la turin a hriattir bawk. Dr Ghosh hi a ban aṭanga rei lote hnuah government college dang, Calcutta National Medical College principal atan dah a ni leh nghal nia sawi a ni.