Bihar CM-in Land Acquisition Bill duhloin chaw ngheia nawrh a tum

Bihar Chief Minister Nitish Kumar chuan sorkar laipuiin land acquisition amendment bill a siam tum chu a duh lohna lantirin, ni khat chhung chaw ngeia nawrh huaihawt a tum tih a sawi a, state mipuite pawh a nawrh huaihawt hi zawm turin a sawm.

Nitish Kumar chuan bill sawisel hlawh tak hi sût leh a nih theihna atan Narendra Modi kaihhruai sorkar laipui chu na taka nawr turin mipuite a chah bawk. Chaw ngheia nawrh a huaihawt tum ni hi a la sawichiang lo.

Kumar chuan Patna, Gandhi Maidan-a an party, Janata Dal-United party worker-te kalkhawmnaah he thu hi a sawi a, land bill siamṭhatna tum dan chu 'black law' a ni tiin, loneitute ngaihthahna a ni, a ti.

"Kan party chuan he 'black law' hi kan dodal a, loneitute thlavang hauhna turin he dan duh lohna campaign hi kan nei dawn a ni," tiin a sawi. BJP chuan Lok Sabha inthlanpui neih dawnah loneitute vote hmuh tumin theihtawp an chhuah a, an vote tlin hnuah loneitute hi theihnghilhin an kalsan leh si a ni, a ti.

"Tunah chuan Modi leh BJP chuan loneitute ram chu sumdawngte hlawkna tura laksak tumin an bei leh si a ni," tiin Bihar CM chuan a sawi.