AAP chhungah buaina; Kejriwal-a paihthlak tum an awm

Delhi-a rorellai, Aam Aadmi Party chhungah buaina a awm a, an party hotu lu ber Arvind Kejriwal paihthlak tum an awm niin party thuchhuah chuan a tarlang. Naktukah AAP hian thutlukna siam turin meeting a nei dawn.

AAP founder member Yogendra Yadav leh Prashant Bhusan-te chuan an party kalphung leh Kejriwal-a thiltih danah lung­awi loin party chhung­ah an sawisel a, mahse an sawiselna thu hi pawn lamah a put chhuak a ni. Naktuka meeting neih hun­ah Yadav leh Bhusant-te hi party thuneitu sang, Political Affairs Committee aṭanga paih an ni dawn nia sawi a ni.

Party chhunga buaina a awm thu hi nimin khan AAP chuan a sawilang a, "Arvind Kejriwal-a paihthlak tuma beihna pawh a awm a ni," a ti. AAP hruaitu Sanjay Singh chuan, "Ṭhenkhat­in kan party hi fiamthu thawhna atan an hmang a ni. Nilaini-a national executive meeting neih hunah, hruaitu hlun ṭhen­khatin Arvind Kejriwal-a an beih vanga hma lak dan turte ngaihtuah a ni ang," a ti.

February 26 khan Bhusan chuan party hnenah lehkha thawnin, AAP kaldan phung ṭha a tih loh thu leh, mi pakhat party anga a kal chhoh tawh dan chung­changte a ziak. He a lehkhathawn hi nimin khan mipui hmuh theihin a darh a ni. Bhusan chuan an party kalphung hrang hrang leh Kejriwal-a chu sawiselin, "Kan party hi volunteer-te thlan leh mittui hmanga din a ni a, heng mite lakah hian bat tam tak kan nei a, kan dinna chhan hi kan kalpen san tur a ni lo a, mi pakhat party angah kan chhuah tur a ni lo," a ti.