I-Day lawmnaah security mi leh sa 10,000 chuang duty dawn

Vawiin hian ram pumah India Independence Day lawm a ni dawn a, a lawmna pui ber chu Delhi-a Red Ford-ah neih a ni dawn a, hemi atan hian venhimna lam pawh khauh taka kalpui a ni.

Independence Day lawmna, Red Fort leh a chhehvelah venhim hna thawk turin security mi leh sa 10,000 chuang an duty dawn a, khawpui chhung hmun hrang hrangah police ṭhahnem tak an duty bawk ang. I-Day lawm hma hian police-te chuan khawpui chhunga licence nei loa guest house leh hotel dinte pawh an khartir vek a, border-a checkpost zawng zawngah motor lut leh chhuakte pawh uluk taka entir vek an ni bawk. Thawhṭanni aṭanga vawiin chawhnu lam thlengin motor lian luh khap a ni.

Khawpui chhunga traffic a buai lohna turin junction pawimawhah duty turin traffic police 3,000 duty tir an ni dawn. IGI Airport, rel station, bus stand, mall leh market-ahte police leh paramilitary force-te dah vek an ni bawk.

Delhi police-te chuan Red Fort-ah hian venhimna thuah eng emaw zatin kalpui a ni dawn tih an sawi a, AI-based facial recognition CCTV camera pawh 700 dah a ni. Police-te hian Red Fort-a hun hmannaa telte finfiahna tur hian smartphone-based application an hmang dawn bawk. Prime Minister leh VVIP dangte veng turin sniper, elite SWAT commando, kite catcher leh sharpshooter-te pawh dah vek an ni dawn a ni.

Prime minister Narendra Modi chuan vawiin hian Red Fort-ah I-Day pual thuchah a sawi dawn a, hei hi a kaihhruai NDA sorkar term thumna hnuaia I-Day-a thu a sawina hmasa ber tur a ni ang.

Deputy Commissioner of Police (North) Manoj Kumar chuan I-Day lawmnaah hian mi 20,000 - 22,000 vel tel tura rin a nih thu a sawi a, he huna tel turte chu metro hmanga kal turin a ngen a ni.

Kumina Independence Day lawmna thupui atan hian sorkarin kum 2047-a India ram developed nation-a siam tuma a hmathlir pualin, 'Viksit Bharat' tih hman a ni.