Kolkata-a doctor thahna chhui hna CBI in la

West Bengal khawpui, Kolkata-a sorkar enkawl, R.G. Kar Medical College & Hospital-a doctor zirlai hmeichhe pakhat pawngsual leh thah a nih chungchang chhui hna chu Calcutta High Court thupek angin Central Bureau of Investigation (CBI) chuan a la ta. Nimin khan special CBI team leh forensic expert chuan Kolkata hi an thleng a ni.

Calcutta High Court-a chief justice T.S Sivagnanam leh justice Hiranmay Bhattacharya awmna bench chuan doctor zirlai thah a nih dan chhuinaah Kolkata police-te chu hmasawnna nei loa puhin, Thawhlehni khan he case hi CBI kuta hlan turin thupek a ti chhuak a ni.

CBI team hian he tualthahna thleng kaihhnawiha an man awmchhun, SanjayRoy chu nimin vek khan Kolkata Police-te kut aṭanga lain an kawl a, thu an zawtfiah dawna ni. CBI hian tualthah leh pawngsual thubuai an ziak lut tawh bawk.