J&K Assembly inthlan hun kar tharah tih chian tum

Election Commission of India (ECI) chuan nimin, August 14 khan union home secretary Ajay Kumar Bhalla chu meeting neihpuiin, Jammu & Kashmir security dinhmunte an sawi ho a, J&K-a assembly inthlan neih theih hun tur hi kar tharah chuan tih chian hman an inrin thu an tarlang.

ECI member pathumte chuan J&K Union Territory hi kar liam ta khan tlawhin, inthlan neihna tur atana a inpeih leh peih loh te an thlithlai a ni. Jammu-a thuthar thehdarhtute bulah Chief election Commissioner Rajiv Kumar chuan UT-ah a rang thei ang bera assembly inthlan buatsaih chu poll panel chuan a tum tih sawiin, chhunglam leh pawn lam atang emaw pawhin inthlan neih tur hi tihbahlah theih a ni dawn lo tih a sawi.

Jammu & Kashmir hian Lok Sabha inthlan hnuhnung berah pawh khan record ṭha tak a nei a, Kumar pawhin hei hian Union Territory-a mipui thlan sorkar din kawngah nasa takin a puih bakah, assembly inthlan hlawhtling tak a thlen ngei beiseina siamtu a ni tih a sawi bawk a ni.

Assembly inthlan hi buatsaih a nih chuan, kum 2019 August thlaa sorkar laipuiin J&K special status pekna, Article 370 a tihtawp hnu leh, J&K chu UT pahnih - J&K leh Ladakh-a a ṭhen hnua assembly inthlan buatsaih hmasa ber a ni dawn a ni.