Ram pumah 78th Independence Day lawm a ni

India ram pumah nimin, August 15 khan Independence Day vawi 78-na lawm a ni a, a lawmna pui ber Delhi-a Red Fort-ah prime minister Narendra Modi chuan ram tana thuchah a sawi.

Prime Minister hian a kaihhruai National Democratic Alliance (NDA) sorkar term thumna hnuaia Independence Day-a thu a sawina hmasa ber leh, Independence Day thuchah a sawi vawi 11-na a ni. Nimina a thusawi hi minute 98-a rei niin, I-Day speech a neih tawha a la sawi rei ber a ni.

Red Fort-a thu a sawiah PM Modi chuan India-in a hun rangkachak, golden era a hmang mek tih sawiin, kum 2047-a India chu developed nation-a siam hman an tumna, Viskhit Bharat chuan a nghak mek a ni, a ti. 'Vikshit Bharat' chu thu chauh ni lo, ram mipui vaibelchhe 140-te thil tum leh suangtuahna a ni, a ti. India ram politics in hmel thar a hmuh a, democracy thuamchakna tura ngaihtuahna thar neitu, chhungkaw lama politics nena inkaihhnawhna la nei lo, ṭhalai nuai khat chu politics luhchilh turin a sawm.

Prime Minister hian India ram chu khawvel huapa thil siamna hmunpui siam tum a nih thu sawiin, a ram thil neih leh thawktu thiam tak takte a hmang ṭangkai dawn a ni, a ti. Ram chhunga thil siam chhuahte chu fakin, ram chhunga bakah leh international market mamawh phuhru hei tura thil siam chhuak tam turin a chah. India budget 2024-a sawi lan angin, sorka rlaipui chuan ṭhalaite chu skill training pek an ni dawn a, khawvel skill capital ni turin hma a la dawn tih a sawi bawk.

I-Day-a PM thusawi langsar ṭhenkhatte :

Women Safety : Kolkata hospital-a doctor zirlai pawngsual leh thah a nih chungchangah West Bengal sorkar beiin, mipuite thinurna pawh a hriatthiampui thu PM chuan a sawi. "Kan nu leh farnute laka hleilenna nasa tak thleng avangin mipui an thinrim a ni. Hetiang hi kan ram, society, state sorkar pawhin a ngaih pawimawh hle a ngai. Hmeichhiate laka pawikhawihna thleng ṭhin hi a rang thei ang bera chhui zui a, pawikhawitute chungah pawh rang taka hremna na tak pek a ni tur a ni," a ti.

Uniform Civil Code : PM Modi chuan Uniform Civil Code (UCC) hman a duh thu pawh sawilang lehin, mahse 'secular civil code' tiin a sawi thung. Tuna civil code awm mek chu sakhaw behchhanna inthliarna tam tak siamtu a ni tiin, "Tuna ramin a mamawh chu secular civil code a ni, " a ti a, hei hi Constitution siamtute duhthusam tihpuitlinna tur a ni a, ram inpumkhatna tur a ni, a ti bawk.

Bangladesh : Bangladesh rama tualchhung buaina thleng mek chungchang pawh PM chuan sawi chhuakin, Hindu leh minority dangte himna chu ngaihtuah a ngai hle a ni, a ti. Bangladesh ram buaina pawh an chinfel thuai a beisei thu a sawi.

One Nation, One Election : Ram puma a ruala inthlan buatsaih a nih theihna tur, 'one nation, one election' hman a ṭul thu PM chuan a sawi leh bawk. "A hran hrana inthlan buatsaih fo hian ram hmasawnna a tibahlah ve thei a ni," a ti. President hlui Ram Nath Kovind kaihhruai panel chuan 'one nation, one election' rawtna hi zirchaingin report pawh ṭha tak a thehlut tawh tih a sawi a, political party hrang hrangte pawhin an ngaihdante an sawi tawh a ni, a ti.

Medical Education Expansion : PM chuan kum nga chhungin medical seat thar 75,000 siam belh a ni dawn tih a puang. Zirlai tam tak ram pawn lamah medical zir tura kalin, sum nuai tel an seng ṭhin a ni, a ti. Kum 10 liam ta chhung khan a kaihhruai sorkar chaun medical seat hi nuai 1 velah a lo tipung tawh a, kum nga chhungin 75,000 siam belh leh a ni dawn tih a sawi.

State-level Investment Competition: Prime Minister chuan state sorkarte chu investment ti tur an hip luhna tura policy ṭha tak nei tur te, sorkar inrelbawlna ṭha siam tur te leh, dan leh thupek dinhmun rinngam leh rintlak nei turtein a chah bawk.