Nawrh huaihawtten RG Kar Hospital suasam

Kolkata khawpuia RG Kar Medical College and Hospital-a kum 31 mi, doctor zirlai pawngsual leh thah a nih avanga lungawi lohna lantirte chuan Nilaini zan khan pawikhawihna thlenna hmun, hospital hi luh chihin an suasam.

Nilaini zan khan Kolkata leh ram chhung hmun dangah hmeichhiate chuan doctor zirlai chunga pawikhawihna rapthlak tak thleng duh lohna lantirna kawngzawh, "Women, reclaim the night" tih thupui hmangin an nei a ni. Kolkata-a nawrh huaihawtna tel ṭhenkhat chua hospital hi luhchilhin, hospital pawna hungna an siam leh ṭhuthlengte chu an tichhia a, hospital emergency ward pawh suasamin pawn lama police motor dingte pawh an khawih zui bawk. Pungkhawmte hnawh darhna atan police lam chuan tear gas te an hmang ve bawk. Tharum thawhna thlentute nena an innawr buai avangin police zingah pawh hliam tuar an awm nual a ni.

Tharum thawhna thlenna kawnga mawhphurtute hi tute nge hriat chian an la ni lo. Tharum thawhna a thlen lai hian hospital pawna boruak muanawm tak hnuaia ni eng emaw chen lungawi lohna lo lantir tawh, doctor leh zirlaite chu inkhuarna hmunte tih chhiat sak an ni ve bawk avangin an insaseng a ngai hial a ni.

Buaina chawk chhuaktute hi hriat la ni lo mah se, West Bengal-a leader of oppositioin, BJP MLA Suvendu Adhikari chuan chief minister Mamata Banerjee-in a tirhte niin a puh. Banerjee hian Trimamool-a misual rualte chu RG Kar Hospital bula rally neite bulah tirin, an zinga mi anga inlanin Hospital hi an suasam zui ta a ni, a ti. TMC lam hian a puhna hi an la chhang lo, mahse TMC general secretary Abishek Banerjee chuan RG Kar-a thil thleng chu an dem takzet tih sawiin, tharum thawhna thlennaa inhnamhnawihte chu eng ang mi pawh ni se dan anga an chungthu relsak an ni ang, a ti.

Police-te chuan hospital luhchilhtu hi mi 40 vel niin an sawi a, bungruate an suasam bakah police-te chu lungin an tawng bawk niin an sawi. RG Kar Medical College and Hospital suasam a nih kaihhnawiah hian mi pakua an man tawh a ni.