Maharashtra-in bawng talh leh a sa zawrh a khap

Maharashtra sorkar chuan Maharashtra Animal Preservation (amendment) Act (MAPA), 1995 hnuaiah an state chhungah bawng, lawi leh sial talh a khap bakah a sa zawrh a khap bawk. He khapna dan hi Thawhṭanni khan President Pranab Mukherjee chuan a pawmsak a ni.

Bawng talh leh a sa zawrh khapna, Maharashtra Animal Preservation (Amendment) Bill, 1995 hi kum 1995 khan BJP-Shiv Sena sorkar laiin pass a ni a, mahse hun rei tak tihkhawtlai a ni. Tunah hian BJP-Shiv Sena sorkar ding lehin, BJP MP-te nawr­na avangin a taka hman turin President-in a pawmpui ta a ni.

State pasarih-a BJP rualte chuan Maharashtra BJP MP Kirit Somaiya hoin President Mukherjee an hmu a, hunrei tak bawng talh khapna dan tihkhawtlai tawh hi pawmsak tura ngenin memorandum an thehlut a ni. Memorandum an thehluhah hian bawng, lawi leh sial talh khapna pawh a tel a, mahse water buffalo erawh chu talh phal a ni thung.

Maharashtra Animal Preservation (Amendment) Bill hnuaiah hian bawng, lawi leh sial talh luite chu hremna na tak pein, bail theih loh an ni ang. Kum nga thleng lung in tantir leh, Rs 10,000 thleng chawitir theih an ni ang. Bawngsa zuar luite pawh kum nga lung in tantir leh Rs 10,000 thleng chawitir theih an ni bawk ang.

Chief Minister Devendra Fadnavis chuan President Mukherjee-a'n bawng talh khapna bill a pawmsak ta chu lawmawm a tih thu a sawi.

Animal husbandry minister Eknath Khadse chuan bill hian dan loa bawng, lawi leh sial bakah an sa hralhchhuah leh sumdawnna atana hman ṭhinte a titawp dawn a ni, a ti.

Thla hmasa khan Maharashtra state-ah hian Hindu ṭhenkhat­in beef industry beiin, bawng sa zawrh tur phurhna motor-te an lo mansak a, hemi hnu pawh hian bawngsa zawrhna dawrte pawhin beih an tawk a ni.