AAP: Kejriwal lamṭangte'n audio tape an tichhuak

Delhi-a rorellai, Aam Aadmi Party (AAP) chhung­a buaina chuan zual lam a pan zel a, party hotu leh Del­hi Chief Minister Arvind Kej­riwal-a lamṭangte chuan an party sawiseltu, senior leader Yogendra Yadav leh journalist inkawmna record an tichhuak.

Yogendra Yadav leh journalist inkawmna hi Yadav hriat loa record nia sawi a ni. An inkawmnaah hian Yadav hian an party kalphungte sawi­selin, inthlan kaihhnawiha thutlukna an siam dante pawh a hrilh vek a ni.

AAP Delhi Secretary Dilip Pandey chuan a hmain Yadav sawiselna hi disciplinary committee hnenah a lo thehlut tawh a, party kalh zawnga thu a sawi avangin a chunga action la turin a phut.

Yadav bakah AAP foun­d­ing member zing a mi, Pra­shant Bhushan pawhin kar hmasa khan National Executive hnenah lehkha thawnin, an party kaldan chu ṭha a tih loh thu leh, mi pakhat duhdan anga an kal tawh thute a lo thlen tawh bawk. Hemi hnu hian Yadav leh Bhushan-te hian National Executive-ah hian joint letter thehlutin, ethics and grievance committee chu hnathawk thei tura siam an duh thute an sawi a ni.

Prashant Bhushan chuan an party inrelbawl dan sawi­sel mah se, AAP chhuahsan tumna a nei lo tih a sawi. Party hotu, Arvind Kejriwal nen an inkar boruak ṭha lo siamṭha tura a inhawn reng thu leh, inbiakna neihpui pawh a duh thu a sawi.

AAP hotu Arvind Kejriwal-a chuan an party chhunga buaina thleng chuan a rilru a ti na hle tih a sawi a, "Delhi mipuite min rintawkna phatsanna a ni," a ti. Hemi rual hian party chhunga buaina chuan Delhi sorkar-ah nghawng a nei dawn lo tih a sawi bawk.