Kejriwal-a'n AAP hotu a nihna atanga ban a tum

Aam Admi Party (AAP) chhunga buaina awm mek chungchang ngaihtuahin nimin tlai khan party thuneitu sang, National Executive meeting neih a ni. Meeting neih hma lawk hian party hotu lu ber, Delhi Chief Minister Arvind Kejirwal chuan convenor a nihna aṭanga ban a tum thu a sawi.

Kejriwal-a chuan AAP hotu lu ber leh Delhi CM nih kawp chu a tan a rit lutuk tih sawiin, Delhi sorkar enkawlna lamah a insawrbing theihna turin party hotu a nihna aṭanga ban a tum tih a sawi.

AAP-in 'one-post' policy a lo kalpui tawh angin kar hmasa khan Kejriwal hian AAP convener a nihna aṭang rahian ban a lo tum tawh a, mahse party thuneitu sang, national executive chuan a banna lehkha hi a hnawlsak a ni.

Party hruaitu hlun pahnih, Prashant Bhushan leh Yogendra Yadav-te'n an party kalphung leh Kejriwal-a an sawisel avangin party chhung boruak a ṭha lo hle a, nimin khan member 21 awmna national executive chuan meeting an nei a ni.

Natonal Executive meeting thutlukna siam hi hriat chian hman ni lo mah se, an party hotu lu ber laka hel Bhushan leh Yadav-te chung­ah action an lak ngei rin a ni.

Hetihlai hian Yadav chuan party kalphungah lung­awi lohna nei mah se an party hi chhuahsan a tum lo tih a lo sawi tawh. "Party tihphel emaw, chhuahsan emaw kan tum lo. Kan party hi tih­thianghlim a, tihchangtlun kan tum a ni," a ti.

Nimina meeting-ah hian Kejriwal a tel ve lo a, a awmna leh blood sugar enkawl turin Bangaluru a pan. Kerjiwal chuan an party chhunga buaina awm chuan a rilru a ti na hle tih sawiin, Delhi mipuite'n an laka rinna an nghah phatsanna ang hiala a ngaih thu a sawi.