Maha sumdawngte'n bawngsa zawrh khapna an khing dawn

Maharastra sorkarin an state chhunga bawng, lawi leh sial talh leh an sa zawrh khapna dan a siam chu sumdawngte chuan court-ah khin an tum.

State sorkar hian bawng talh leh a sa zawrh khapna, Maharashtra Animal Preservation (Amendment) Bill hi kum 1995 khan a lo pass tawh a, he bill hi hun rei tak tihkhawtlai a nih hnuin President Pranab Mukherjee chuan a pawmsak ta a ni. Hemi hma, kum 1976 khan Maharashtra sorkar hian bawngpui leh a no talh khapna dan a lo siam tawh a, tuna a dan thar siamah hian bawng bakah lawi leh sialte telh belh an ni.

Maharashtra-a rorellai, BJP chuan 'bawng leh bawng aṭang thilsiamte humhalh' a tum thu a manifesto-ah a lo tarlang tawh a, sorkarna an siam hnuah Chief Minister Devendra Fadnavis kaihhruai sorkar chuan bawng humhalhna dan hi pawm ngei a nih theihna turin ngawrh takin an nawr a ni.

Bawng, lawi leh sial talh leh an sa zawrh khapna dan hian sumdawngte a nghawng nasa dawn hle a, khapna dan hi President-in a pawmpui ta tih chu a thu chauha an la hriat avangin chanchin kimchang an nghak mek tih All India Jamitual Quresh member, Anees Qureshi chuan a sawi. Chanchin kimchang an hriat hunah a ṭul dan azirin Supreme Court-ah khin an tum tih a sawi bawk.

Loneitute pawl, Shetkari Sanghatana pawhin sorkar dan siam hi na takin an sawi­sel bawk a, hei hi loneitute dinhmun tihchhiatsakna a ni, an ti. "Loneitute ngaihthahna a ni. He thil avang hian lawi leh sial upa tawh, hnathawka chhawr theih tawhlote hralh theih an ni tawh dawn lo a, hei hian loneitute tan phurrit a siambelh dawn a ni. Hralh theih an nih dawn tak loh avangin an chaw leh tui in tur thlengin an ngaihtuah belh a ngaih phah dawn a ni," a ti.

Restaurant neitute pawhin he dan thar hi an dodal nasa hle, restaurant tam tak chuan eitur an hralh chhuah zing 50% chu bawngsa leh bawngsa aṭang siamte a ni, an ti.