Nirbhaya documentary film tihchhuah khap a ni dawn: Home minister Rajnath

Union Home Minister Rajnath Singh chuan kum 2012-a Delhi khawpuia hmeichhe pakhat pawngsual rawn a nih avang a hnua a nunna chan ta chanchin, documentary film siam chu a film siamtu hian inkaihhruaina dan siamte a bawhchhiat avangin tihchhuah phal a ni dawn lo tih a sawi.

Nirbhaya documentary film siamtu hian pawngsual­tu zinga pakhat interview a neihpui a, hei hian mipuite thin a tithinur hle. Nimina Rajya Sabha inkhawmah pawh hemi chungchang hi sawichhuah a ni a, member-te chuan pawikhawihtu interview neihpui a ni chu an dem thu an sawi.

Rajnath Singh chuan, "He film hi hlawkna lam ni loin, khawtlang nun siam ṭhatna atana siam phalna pek chauh a ni. Documentary film siamna tur pawh hian bithliah chin siamsak a ni. Mahse dan siamte bawhchhia a, interview a neihpui tih jail thuneitute'n an hriatin legal notice an pe nghal a ni," a ti.

Singh chuan he documentary hi sorkarin tihchhuah a phal dawn lo tih a sawi a, "Sorkar chuan December 16-a pawikhawihna rapthlak tak thleng kha a dem a, he chhiat­na thleng hi mimal emaw pawl emawin hlawkna an hmuh theihna tura an lo hman kan remti dawn lo. Sorkar chuan hmeichhiate himna leh zah­awmna humhim turin a bei zel ang," tiin a sawi.

Information and Broadcasting Ministry pawhin thi tura a chungthu relsak, pawikhawihtu interview lai lanna documentary hi tih­chhuah khap a nih hriattirna a tichhuak bawk.

Hetihlai hian film siam­tu, Leslee Udwin chuan dan siamte a zawm thu leh, pawikhawihtu interview tur hian Ministry of Home Affairs leh Tihar Jail thuneitute hnen aṭanga phalna a hmuh thu a sawi thung.