MSP paih a ni dawn lo: Prime Minister

Prime minister Narendra Modi chuan nimin khan Madhya Pradesh-a loneitute hnenah video link kaltlangin thu a sawi a, farm law tharah hian Minimum Support Price (MSP) chu paih a ni dawn lo tih a sawi.

Narendra Modi chuan nimina thu a sawinaah hian farm law thar chu nasa takin a hum a, eptu party lam chu loneitute phatsanah leh a ni lo zawnga an rilru hruaikawiah puhin, an duhzawng an theh lar theihna turin nawrh huaihawtte pawh an thlawp a ni, a ti.

Modi chuan Minimum Support Price tihtawp chungchang sawi lana awm ṭhin chu dawt lian ber a nih thu sawiin, paih a ni dawn lo tih a sawi a ni.

"Heng dante hi zan khat thil thua siam a ni lo. Kum 22 liam ta chhung khan sorkar apiang leh state tinin an buaipui tawh. Loneitu pawl, agricultural expert, economist, scientist leh progressive farmer-te chuan siam ṭhat an duh. He dan sawiseltu party-te pawh hian an manifesto-ah farm law siam ṭhat chungchang hi an lo tiam tawh ṭhin a ni," a ti.

Loneitu tam takin Delhi ramria sorkar laipui farm law pawm thar nasa taka an dodalna karah prime minister Narendra Modi hian hemi chungchang hi a sawi a ni. 

 PM thusawi langsar zual ṭhenkhat:-

-    MSP paih a ni dawn tih sawia awm chungchang hi dawt sawi tawh azawnga dawt lian ber a ni. Ramchhung hmun hrang hranga loneitute hnenah hei hi chiang takin ka sawi duh a ni, MSP hi awm reng tura duan a ni.

-    Eptute hian dawt sawi an ching hle a, loneitute dawt hmangin vote an thlak tir ṭhin. Inthlan a zawh hnuah chuan an ṭhu mai mai a, an eirukna hmanga an hlawkna chu an chen tawh mai ṭhin.

-    Eptu party-te chuan nangni loneitute hi politics atan vawiinah hian an hmang che u a ni, chu chu an political ground an hloh vang a ni.

-    Hemi chungchangah hian hming ṭhat ka hlawh an hlau a ni. Khawngaihin ka tan hming ṭhat chu lo hlawh ru, ka tana thil pawimawh awmchhun chu loneitute hmasawnna a ni.