Eptu party-ten PM Independence Day speech an sawisel

Eptu party-te chuan Independence Day puala prime minister Narendra Modi thusawi chu an sawisel a, inṭhendarhna lam hawi zawnga thu sawiah an puh. Congress party chuan 'communical civil code' chungchanga PM thu sawi dan chu Dr. B.R Ambedkar zah lohna a ni, an ti bawk.

Congress general secretar Jairam Ramesh chuan, 'Non-biological PM-in tun thlengin 'communal civil code' kan hmang nia sawi chu Dr Ambedkar zah lohna liantak a ni a, ani hi Hindu personal law siamṭhatnaa, 1950s laihawla a taka tihpuitlin a nihna kawnga mi ropui a ni. Heng dan a siamṭhatte hi RSS leh Jan Sangh chuan nasa takin an dodal a ni," tiin X-ah a post.

Communist Party of India (CPI) general secretary D. Raj chuan Prime Minister thusawi apiang chu Rashtriya Swayamsevak Sangh (RSS) in inṭhendarhna agenda a neih zul zui zel a ni tiin, PM chuan kum 2047 chungchang daih a sawi a, mahse ram chhunga issue awm mekte a sawi lang leh si lo, a ti.

National Federation of Indian Women (NFIW) general secretary leh CPI leader Annie Raja pawhin PM Modi-a'n 'one nation, one election' a sawi chungchangah a phena a thil tum ruk hre lo mah se, inthlanna felfai leh dik buatsaih chu ngaih pawimawh hmasak phawt tur a ni, tiin a sawi.

Rashtriya Janata Dal (RJD) leader Manoj Jha chuan Modi chuan India ramah Prime Minister pakhat chauh a awm tih a hriatchian a ngai a, eptu party vote-tute pawhin Prime Minister hran an nei lo tih a hriat a ngai a ni, a ti. "Rilru zau leh inhawng tak a neih kan beisei apiangin min ti beidawng zel ṭhin," a ti.