Sorkar hospital-te darkar 6 chhunga FIR thehlut turin hriattir

Union health ministry chuan nimin khan ram chhunga sorkar enkawl hospital hrang hrangte chu campus chhungah tharum thawhna thleng, staff leh health worker-te beihna thleng a awm a nih chuan darkar ruk chhung ngeia police-ah complaint theh lut ṭhin turin a hriattir.

Kolkata-a RG Kar Medical College and Hospital-a doctor zirlai rawng taka pawngsual leh thah a nih hnua ram chhunga medical lama thawkten an hnathawhna hmuna venhimna ṭha zawk pek phuta nawrh an huaihawt hnuah he hriattirna hi tih chhuah a ni.

Health Ministry chuan pawikhawihna thlen aṭanga darkar ruk chhunga police-a complaint thehluh a nih loh chuan institution hotute chuan mawhphurtuah puh an ni ang tiin a tarlang.

RG Kar Hospital-a doctor zirlai thah a nih avanga lungawi lohna lantir a nih ṭumin, pungkhawm zinga ṭhenkhat chuan hospital hi luh chilhin bungruate an suasam a ni. Police-te chuan he pawikhawihna thleng kaihhnawihah hian mi 19 an man tawh a, August 22 thleng police custody-ah an awm ang.

Doctor zirlai thah a nih dan chhui hna hi Kolkata Police kut aṭangin CBI kutah hlan a ni tawh bawk. West Bengal chief minister Mamata Banerjee hoin nimin khan tualthah tak tana rorelna dik phutin rally huaihawt a ni. Hetih lai hian BJP women's wing chuan RG Kar Hospital beih a nih chungchangah CM laka lungawi lohna lantirin nimin vek khan south Kolkata-a Banerjee chenna in panin kawng an zawh ve bawk.