Rahul Gandhi an ṭhuttirna hmunin sawi zui a hlawh

Lok Sabha-a Leader of Opposition, Congress MP Rahul Gandhi chu August 15-a Red Fort-a Independence Day lawmnaah a tel a, mahse a ṭhutna tura an lo ruahman sak chuan sawizui a hlawh hle.

Protocol-ah chuan LoP hi cabinet minister rank a ni a, hei vang hian a ṭhutna pawh tlar hmasaah a ni tur a ni. Mahse Rahul Gandhi hi VIP area-a tlar nga-naah ṭhut tir niin, union ministers, Olympic medalist leh CJI Chandrachud-te hnungah a ṭhu a ni. He thil hi mi tam takin an sawi zui a, a bikin Congress party lam an lungawi lo hle a, BJP sorkarin seat a rem tir dan chu mipuite zah lohna a ni, an ti. Rajya Sabha-a LoP, Congress party president Mallikarjun Kharge ṭhutna tur pawh tlar hnung berah ruahman a ni a, mahse Kharge hi I-Day lawmnaah hian a kal lo a ni.

Red Fort-a I-Day lawmnaa Rahul Gandhi a tel hi kum 2014-a Modi-a'n thuneihna a chan hnuah Independence Day programme-a LoP an tel hmasakna ber a ni. Protocol-ah chuan Gandhi hi tlar hmasa berah, senior minister-te nen an ṭhu ho tur a ni.