PM thusawiah loneitute an lungawi lo

Prime minister Narendra Modi-a'n Independence Day-a thu a sawiah agricultural sector thuam chaka siam thar a ngaih thute sawi mah se, nawrh huaihawt mek loneitute chuan an thil phut chungchang ngaihven a ni lo tih an sawi.

Prime Miniser hian Red Fort-a thu a sawiah, "Agricultural system hi thlak a ngai a, sorkar laipui chuan loneituten tunlai thiamna te an hmang ṭangkai theihna turin a theih angin a pui zel a ni. An tana thil a awlsam theihna turin internet connectivity, health care ṭha zawk leh an fate hna thawh turte pawh ngaihtuah sak an ni," tiin a sawi. Natural farming method hmanna turin sorkar chuan programme hrang hrang a duang tih a sawi bawk.

Hetih lai hian Punjab leh Haryana aṭanga loneitu kal khawm, Shambu border-a thla ruk zet nawrh huaihawt tawh, loneitute chuan PM thusawi chu a taka thil thleng nen a inpersan hle tih an sawi thung. "Loneitute thil duh leh an mamawh takte chu kan khuaah te, kan nawrh huaihawtna hmunah te rawn kal chilh se an hrethiam chauh ang. PM-in technology lama hmasawnna tur a sawite hi leiba avanga buai mek loneitute tan thil theih a ni lo," an ti.

Loneitute hian Ningani khan an thil phut nawrna atan tractor rally an nei leh a ni. Kumin February aṭang khan an thil phut hrang hrang tihlawhtling tura nawrna atan nawrh hi an huaihawt a, an thil phut zingah hian an thlai thar atana minimum support price siam pawh a tel.