Sorkarin a khap chungin BBC-in Nirbhaya documentary film a tichhuak
Kum 2012 December thlaa Delhi khawpuia hmeichhe pakhat pawngsual rawn leh kutthlak a nih avanga a hnua a thih zui tak dan chungchang tarlanna, Nirbhaya documentary film 'India's Daughter' tih chu sorkar laipuiin tihchhuah a khap chungin BBC-in a tichhuak.
Documentary film siamtu, British film maker Leslee Udwin hian pawngsualtu zinga pakhat, thi tura a chungthu relsak tawh chu a tanna, Tihar Jail-ah interview a neihpui a ni. Hei hi sorkar chuan sawiseilin, film sian dawna intiamkamna awmte a bawhchhia a ni tiin tihchhuah an remti dawn lo tih Union Home Minister Rajnath Singh chuan a lo sawi tawh a ni.
Pawngsualtu zinga pakhat, Mukesh Singh hian interview a neihah hian pawngsual tawktu a demna thu sawiin, 'Zan dar 9 hnu lamah khawpuiah hian a vakchhuak tur a ni lo' tiin, pawngsualna thlengah mipate aiin hmeichhiate'n mawh an phur nasa zawk tiin a sawi. Rajnath Singh chuan Mukhesh Singh-a thil sawi chu thil huatthlala tak leh hmeichhiate zahawmna tihbawrhbanna a ni, tiin film siamtuin a hlawkna uma hetiang thil thleng rapthlak tak a hmang chu a dem hle a ni, a ti.
Hetihlai hian film siamtu, Udwin chuan a documentary siam sorkarin a khap chu pawi a tih thu a sawi a, "India ram chuan dikna chanvo neihte a dah pawimawh a, heng zinga pakhat chu mi tupawhin zalen taka thu an sawi chhuah theihna tura dikna an neih hi a ni," a ti. Mukesh Singh interview a neihpui dawn hian a tanna, Tihar Jail thuneitute leh home ministry aṭangin phalna pawh a la tih a sawi.
Pawngsual tawktu hi Jyoti Singh a ni a, mahse Nirbhaya tia sawi a ni. Nirbhaya pa pawhin a documentary film mitinte'n an en theih tura chhuah ni se a duh thu a sawi. Mukesh Singh-a interview chungchang pawh sawichhuakin, "Jail-a awm chunga khatianga a sawi a nih chuan, chhuah zalen ni ta se eng angin nge a chet ang tih ngaihtuah tham a ni," a ti.
Home Minister chuan an khap chunga BBC-in a tihchhuah luih avangin sorkar a lungawi lo hle a, action lak dan tur a ngaihtuah tih a sawi. BBC in sorkar khapna thupek a palzut avanga lungawi loin nimin khan Varanasi-ah mipuite'n kawng zawhin BBC lim an siamte an hal. MoS Mukhtar Abbas Naqvi pawhin Nibhaya documentary tihchhuak luitu channel chu ngaihdam a ni dawn lo tih a sawi bawk.