AAP Panel pawimawh aṭangin Yadav leh Bhushan ban an ni

Delhi-a rorellai, Aam Aad­mi Party (AAP) chhung­a buaina awm avang­in Nilai­ni khan party roreltu sang, National Executive chuan meeting an nei.

Meeting hi darkar ruk zet neih a nih hnuin, tun hnaia an party kalphung leh party hotu, Arvind Kejriwal sawiseltu, party senior leader pahnih Yogendra Yadav leh Prashant Bhushan-te chu party thutlukna siamtu, Political Affairs Committee (PAC) member a nihna paihsak an ni.

AAP hotu lu ber leh Delhi Chief Minister Arvind Kejriwal chu meeting-ah hian a tel ve lo a, mahse PAC aṭang hian Yadav leh Bhushan paih hi a duh nia sawi a ni. Meeting neih hma lawkin Kejriwal hian AAP hotu lu a nihna aṭanga banna a thehlut a, mahse a banna thehluh hi party thuneitu sang chuan a hnawlsak. Kejriwal hi a hriselna lam enkawl a ngaih avangin ni 10 chhung chawlh lain, Bengaluru-ah in enkawl turin nimin khan a kal nghal a ni.

National Executive meeting-ah member 22 telin vote lak a ni. An zinga 11 chuan hruaitu pahnih helte hi PAC member aṭanga paih an duh a, member 8 chuan paih an duh lo a, pathumin vote an thlak lo.

AAP thupuangtu, Kumar Vishwas chuan PAC member aṭangin Yadav leh Bhushan-te hi paih ni mah se, mawhphurhna dang pek an ni dawn tih a sawi. "AAP inpumkhatna a chhe lo a, Delhi mipui leh rampum mipuite tana thawk turin theihtawp kan chhuah zel dawn a ni," a ti.