Darkar 24 chhungin TMC hruaitu pali bang
West Bengal-a rorellai, Trinamool Congress (TMC) party hruaitu zinga pali chu darkar 24 chhungin an bang.
Ningani khan party senior leader pahnih an bang a, nimin khan hruaitu dang pahnih, MLA Shilbhadra Dutta leh minorty cell leader Karibul Islam te an bang ve leh.
Barrackpore bialtu MLA Shilbhadra Dutta hian party candidate thlan dan chungchangah an party hi a lo sawisel tawh a ni. TMC-ah chuan awm zui zel theih a ni tawh lo nia a inhriat avangin a chhuahsan tih a sawi a, mahse MLA a nihna aṭang chuan ban a tum lo tih a sawi nghal bawk. Party hruaitu tenau zingah pawh banna thehlut hi eng emaw zat an awm tawh nia sawi a ni.
West Bengal-ah hian nakkumah assembly inthlan neih a ni dawn a,hei vang hian BJP chuan TMC paihthlak tumin ṭan a la nasa tawh hle. Union home minister leh BJP senior leader, Amit Shah chuan Bengal hi tlawh a tum a, hemi hunah hian TMC hruaitu bang ho hian BJP an zawm rin a ni. Vawiinah Amit Shah hian ni hnih cham turin Bengal hi a tlawh dawn a, a cham chhungin roadshow leh public rally te a huaihawt ang.