Thla hnih chhunga Hri kai hmuh chhuah tlem ni ber a thleng

Ministry of Health and Family Welfare-in nimina report an tihchhuahah Pathianni khan Covid-19 kai hmuh chhuah thar 55,722 an awm a, hei hi thla hnih chhunga ni khata hri kai hmuh chhuah thar tlem ni ber a ni. Chumai chu a la ni lo, ni khata thi zat an report chu 579 niin chu pawh chu July ni 19 hnu lama ni khata thi zat tlem ni ber a ni bawk.

India ram hi hri kai tam ber dawttu ram  la ni chhunzawm zel mah se Covid-19 chungchangah hian tunhnaiah chanchin lawmawm lam hriat tur a awm ta zeuh zeuh a, hri kai hmuh chhuah thar zat pawh hi thla hmasa leh hmasa leh lam nena khaikhin chuan  a tlahniam nasa tawh hle. Eng emaw lai kha chuan nitin sing kua chuang hri kai hmuh chhuah thar an awm a, tunah erawh ni khata hri kai hmuh chhuah thar zat hi sing nga leh sing ruk inkar velah a kual ta a ni.

Tunah hian positivity rate chu 7.94 a ni a, nitinin positivity rate pawh hi tlem tlemin a tlahniam ve deuh reng. Enkawl dam tawh rate pawh a sang tawh hle a, 88.26% a ni tawh a, heng enkawl dam zawng zawng zinga 80% chu state leh union territory 10-  Maharashtra, Kerala, Karnataka, Tamil Nadu, Andhra Pradesh, Uttar Pradesh, West Bengal, Delhi, Odisha, leh Chhattisgarh-a mite an ni. Ni khata thi zat pawh hi thla thum vel lai chu 600 chuang an nih hnuah nimina report-ah erawh 600 an tling ta lo. 

Kar ruk chhung vel zet hri kai mek zat pawh hi nasa takin a tlahniam tawh a, tunah chuan hri kai mek zat hi nuai riat an tling tawh lo, ni thum chhung chu hri kai mek zat hi nuai riat hnuaiah a awm tawh. 

Health Ministry-in an tarlan dan chuan state leh UT 22-ah chuan hri kai mek 20k an tling tawh lo a, state pathumah chiah hri kai 50k aia tam an la awm.