'India's Daughter' film khap an duh lo

Sorkar laipuiin kum 2012 December 16-a Delhi khawpuia hmeichhe pakhat pawngsual rawn a nih chungchang documentary film siam, 'India's Daughter' tihchhuah a khap chu women activist-te'n an duh lo.

All India Democratic Women's Association (AIDWA) chuan film tihchhuah khap a ni chu an duh loh thu sawiin, mimalin a duh ang thu sawichhuah tura zalenna a neih beih letna a ni, an ti. He film hian pawngsual rapthlak zia a takin a lantir a ni, an ti.

Film siamtu hian pawngsual rawntu zing pakhat chu a tanna Tihar jail chhungah a kawm a, hei bakah hian pawikhawihtute ukil te thusawi pawh lantir a ni. Heng mite thusawi huatthlala tak chungchangah sorkar chuan FIR thehlutin a ṭul anga action la tura an duh zawk thu AIDWA chuan a tarlang bawk.

Hetihlai hian sorkarin he film hi tihchhuah a khap chunga BBC-in a tihchhuah luih avangin Ningani khan BBC hnenah han legal notice pek a ni a, YouTube-a dah pawh sorkarin a ngen angin lak chhuah leh nghal a ni.

Home Ministry official chuan BBC hnena hriattirna an pek tawh thu leh, a chhanna an nghah mek thu a sawi. A ṭul anga hma lak zel an tum thu a sawi.

Film siamtu, Leslee Udwin chuan India sorkarin India's Daughter film tihchhuah a khap chu freedom of speech rahbehna nia a ngaih thu a sawi. "Pawngsualna thleng ṭhin hi tunlai huna kan beihlet ngai ber a ni. Hei hi India chauhin a buaipui ni loin, khawvel puma kan buaipui a ni," tiin, khap a nih chungchangah hian Prime Minister Narendra Modi pawh a be tawh tih a sawi.