Covid-19 kai enkawl dam nuai 30 chuang tawh

India ramah hri kai nitinin nasa takin pung mek mah se enkawl dam pawh an tam tawh hle a, nimina sorkar report tihchhuah aṭanga a lan dan chuan mi nuai 30 chuang chu an dam leh tawh.

Nimina Ministry of Health and Family Welfare-in report a tihchhuahah  hri kai hmuh chhuah thar 83,341 an awm leh a, nimin piah lam report aiin tlemin tlahniam mah se ni hnih chhung a zawnin hri kai hmuh chhuah thar sing riat chuang an awm ta a ni. India ramah hian hri kai hmuhchhuah 39,36,747 lai an awm tawh. 

Ningani khan hri kai enkawl dam 66,659 an awm tih nimina sorkar report chuan a tarlang a, hei nen hian rampumah hri kai zinga 30,37,151 chu an dam leh tawh a ni. Thihpui hi mi 1,096 awm belh leh bawkin hripui vanga thi 68,472 an awm tawh a, hri kai mek 8,31,124 an la awm.

Enkawl dam tawh rate hi a sang tawh hle a, 77.15% ni tawhin thihpui rate chu 1.74% a ni a, hri kai mek rate hi 21.11% a ni thung.

Indian Council of Medical Research (ICMR)-in nimina report a tihchhuahah chuan darkar 24 chhungin ramchhung hmun hrang hrangah sample 11,69,765  an endik leh a, ni hnih chhung a zawnin nuai 11 chuang sample an endik tawh a ni. Hri len ṭantirh aṭanga nimin thleng khan sample 4,66,79,145 an endik tawh.

ICMR hian sample endikna tura laboratory pawmpui 1,631 a nei tawh a, chung zinga 1,025 chu sorkar laboratory niin 606 chu private labo­ratory a ni thung. 

India ram chu hri kai tam ram pathumna la nih chhunzawm zelin hri kai tam ram pahnihna Brazil nen hri kai zat erawh an inthlau tawh lo hle. 

Lakshadweep-ah chuan Covid-19 case a la awm lo a, Mizoram chu case awm tawhna State/UT zinga hri vanga thi la awm lohna awmchhun a ni.

Maharashtra-ah hri kai an la tam ber chhunzawm zel a, nimin sorkar report tihchhuah thlengin mi 8,43,844-in hri an kai tih hmuh chhuah a ni tawh a, nimin report-ah pawh hri kai hmuh chhuah thar 18,105 awm lehin enkawl dam 6,12,484 lai an awm tawh thung a; 2,05,774 chuan hri la kai mekin 24,586 laiin an thihpui tawh.