BJP-in Masarat Alam-a chhuah an dodal

Jammu and Kashmir-a PDP-BJP ṭangrual sor­kar tharin inlakhran tumtu pawl, Hurriyat hruaitu Masarat Alam a chhuah zalen chu rorellai, BJP youth wing chuan na taka sawiselin Inrinni khan lungawi lohna an lantir. Eptu pawl Congress party pawhin Prime Minister Narendra Modi, Home Minister Rajnath Singh leh RSS-te chu Alam chhuah a nih chhan sawifiah turin a phut.

BJP senior leader, Yudh­vir Sethi chuan, "Lung­awi lohna lantir hi BJP youth wing state general secretary-in a kaihruai a, kei pawh ka tel a ni," a ti.

BJP youth wing chuan Masarat Alam chu India dodal zawnga che, Jammu and Kashmir-a helna boruak tisang tu a ni tiin, man leh nghal an phut thu an sawi. "Ram himna tiderthawng thei, ram dodaltu chhuah zalen a ni hi kan pawm thei lo a ni," an ti.

Jammu & Kashmir Pradesh Congress Committee (JKPCC) hruaitu leh MLC Ravinder Sharma chuan Alam chhuah a nih chungchang hi sorkar laipui, PM , Home Minister, RSS leh PMO-a MoS, Jammu bial a mi deputy chief minister Nirmal Singh te'n an sawifiah ngei tur a ni, a ti. PDP-BJP ṭangrual sorkara chief minister, Peoples Democratic Party hruaitu Mufti Sayeed-a'n Musarat Alam a chhuah zalen laia a thawhpui, BJP in a lo dang lo chu sawifiah tura an phut thu a sawi.

J&K CM Sayeed-a hian ṭangrual sorkar a siam­pui, BJP in a remtih loh thu sawi mah se anmahni rawn loin kar kalta Inrinni khan Musarat Alam hi a tanna, Baramulla jail aṭangin a chhuah tir a ni. Alam hi kum 2010-a Kashmir Valley-a India dodal zawnga nawrh a huaihawt vangin man a ni a, jail-ah hian tantir a ni.

BJP chuan CM Sayeed-a'n Alam chhuah a tum chungchangah an party a berawn lo chu an lawm loh thu sawiin, hemi chungchang ngaihtuah tur hian cabinet meeting a ko a, thil awm dan chhui chian an tum thu an sawi.

BJP thawhpui, Shiv Sena chuan BJP hian J&K-a PDP a thawhpui man a tuar ngei a ngai dawn tih a sawi a, "A hma pawhin PDP thawhpui a ṭha dawn lo tiin kan hrilh lawk a ni. Musarat Alam chhuah zalen a ni hi a dik lo a, India mi dik tak a ni lo," a ti.