International Women's Day hman a ni

Nimin khan khawvel pumah hmeichhiate ni, International Women's Day hman a ni a, India ramah pawh hmeichhiate pualin hun hman a ni.

President Pranab Mu­kherjee chuan International Women's Day puala thuchah a tih­chhuahah, hmeichhiate himna leh hamṭhatna pek a pawimawh thu a sawi. Hmeichhiate hnena duhsakna a hlan rual­in, President chuan hmei­chhia venhimna turin dan eng emaw zat siam ni tawh mah se, tihtur dang tam tak a la awm a ni, a ti.

Dan ringawt chu hmei­chhiate himna atana a tawk lo a ni tiin, Presi­dent chuan hmeichhiate chunga mitinte rilru puthmang chu siam­ṭhat a ṭul thu leh khaw­tlangin hmeichhia a ngaihdante pawh siamṭhat a ngai a ni, a ti.

Prime Minister Narendra Modi pawhin hmei­chhiate duhsakna a hlan a, sorkar chuan hmeichhiate dinhmun siamṭhatna tur scheme hrang hrang a kalpui a ni, a ti.

Union Health and Family Welfare Ministry chuan ni thum chhung, March 8-10 chhung hian rampum­ah hmeichhiate'n hriselna ṭha zawk an neih theihna turin special nationwide campaign a nei. Union Health Minister JP Nadda chuan District hospital, sub-district hospital leh community health center-ahte ni thum chhung hian a thlawnin special health check-up camp buatsaih a ni dawn tih a sawi.