India leh China-in inbiakna chhunzawm leh

19th December, 2020

Ladakh-a Line of Actual Control (LAC)-a India leh China sipaite inhmuhthiam lohna thleng chungchangah nimin khan India leh China chuan ramria buaina chinfel dan ngaihtuahin inbiakna an chhunzawm leh.

Ram pahnihte hian Ladakh-a buaina a chhuah hnuah ṭum eng emaw zat inbiakna an nei tawh a, mahse inremna an la siam thei lo. Diplomat levela inbiakna hi kar 11 dawn an chawlhsan hnuah nimin khan an neih chhunzawm leh ta a ni.

Inbiakna hi Working Mechanism for Consultation and Coordination on Border Affairs (WMCC) hnuaiah virtual hmanga neih a ni. Virtual WMCC meet an neih hnuhnung ber chu September 30 kha a ni. November 6 khan militarty-to-military talk an nei bawk. Nimina an meeting-ah hian LAC aṭanga sipaite hnuhdawk chungchang an thlurbing bik dawn nia sawi a ni.