University-ten 1st year leh 2nd year zirlai tan Exam neih leh neih lohah zalenna an nei : SC

Supreme Court chuan Ningani khan ram-chhunga University-te chu undergraduate leh postgraduate-a 1st year leh 2nd year zirlaite tana promotion exam buatsaih leh buatsaih loh chungchangah  zalenna an neih thu a sawi.

SC-a Justice te - Ashok Bhushan, R Sub­hash Reddy leh MR Shah awmna bench chuan University-te chuan an duh hunah leh an duh dan angin 1st year leh 2nd year zirlaite tana promotion exam an buatsaih theih thu a tarlang a, hemi chungchangah hian University Grants Commission (UGC) chuan University-te zalenna a pe a ni, a ti. 

Zirlai pakhat Ayush Yesudas chuan SC-ah hian Public interest litigation (PIL) a thehlut a, kumin April 27-a UGC guideline siamah chuan Covid-19 vangin 1st year leh 2nd year zirlai te chu exam nei loin internal assessment hmanga an result siamsak tum a nih thu a sawi a ni. 

Bench chuan hemi chungchang hi August 14-ah chinfel a nih tawh thu sawiin, July 6-a UGC guideline siamin UG/ PG course-a final year-te tan exam buatsaih ngei tura a tih chu a thlawp thu a sawi a, hemi rual hian 1st year leh 2nd year te exam buatsaih leh buatsaih loh chungchangah university-te chu zalenna pek an nih thu a sawi.